عن الـ (واااااااااااو) المفقودة

صورة لاعلاقة لها بالموضوع

تدوينه جديدة، ويارب مقفلش الصفحة، زي كل مرة من غير ما اكتب حاجة. مش عارف ليه الفترة الغريبة دي؟ أنا حالياً عامل زي زجاجة الحاجة الساقعة؛ الدنيا بترُج فيا، وبرضة مفيش فايدة، مش عاوز -أو مش عارف- أندفع للأمام، واخلع الغطا واخرج.. حلو التشبيه دة :)

طب اتكلم عن إيه؟ دي مشكلة أخرى: وهي إني مشوش.. مش عارف اتكلم عن نفسي ولا عن الناس، عن السياسة، ولا الفن ولا الأدب، ولا آخدها من قاصرها واكتب قصة جديدة؟؟؟ هو دة.. أنا مشوش جداً.

طب انا محتاج إيه؟ ماهو العلاج المناسب، للخروج من هذه الحالة اللعينة، ولماذا تنتابني كل فترة، وكل مرة تبقى طويلاً، أطول من سابقتها؟؟؟ علامات استفهام كتير أوي في التدوينه.

أنا مؤمن؛ إن الإنسان -أو أنا عـ الأقل- سبب شقائه. أنا مؤمن إن الحل والعقدة في إيدي.. لكن الجدعنه إنك تلاقي العقدة، وتعرف الحل. بيقولوا ان أول الطريق لحل أي مشكلة، هو إنك تعترف بالمشكلة دي.. طب انا مش عارف إيه هي!!.

مشكلة كبيرة أخرى، وهي: إني حاسس ان كل شيء عبارة عن هراء.. مبقاش فيه انبهار الطفل الصغير بأي لعبة.. دي حاجة مخوفاني جداً. الإنبهار هو اللي بيخلينا -بيخليني- نستمر، كلمة (واااااااااااااااو) هي السر.. كل أكله حلوة، وكل فيلم جديد، كل مناسبة سعيدة، وكل نجاح محقق؛ لازم يتبع كل الحاجات دي الـ (وااااااااااااااو)؛ إللي من غيرها هتبقى الحاجات دي ولا شيء.. ممكن تفتعل الإنبهار، لكنه لن يكون حقيقياً أبداً.. يجب أن تنبع الـ (واااااااااااااااو) من الداخل.. 

يعني مثلاً:

• أنا الفترة دي، عمّال احمّل أفلام ومسلسلات كنت منتظرها، لكن الـ (وااااااااااااو) لم تنبع من الداخل.

• فرص كتير للنشر، ومسابقات كتير للإشتراك، وأفكار كتير للكتابة، لكن الـ (واااااااااااو) لم تنبع من الداخل.

• كتب جديدة وحاجات كتير للقراءة، لكن الـ (واااااااااااااااااااااااااااااااااااو) لم تنبع من الداخل.

طبعاً دة بغض النظر عن دراستي اللي أنا مش متحمس لها من البداية أصلاً، ولا بعتبر أي حاجة بتحصل فيها -مفيش حاجة بتحصل- تستحق الـ (واااااااااو) الخاصة بيا. جدياً: أحياناً لمّا بلقي نظرة على حياتي من بعيد كدة، بحس ان مفيهاش (الشيء الكبير) اللي كنت اتكلمت عنه في تدوينة قديمة..

يعني فيه ناس بتتجوز، وناس بتخلف، وناس بتشتغل، وناس بتترقى في أشغالها، وناس بتكسب فلوس، وناس بتكتب، وناس بتنشر، وانت بتتكلم في فيلم؟ دة آخرك؟ يا أخي (...)

أوف..  أعتقد اننا أحرزنا تقدم هنا، صح؟ كتبت كلمتين حلوين ملهمش لازمة آهو.. 

وقبل ما اقفل: ياريت لو فيه طبيب نفسي، مر بالصدفة على التدوينة، يرد عليا؛ لو يعرف حاجة تفيدني..

سلام.

22 فبراير، 2012