أول فيلم مصري بخاصية الـ 3D: بين الحب من أول نظرة، والتفكير الإيجابي، والفزلكة.

نفس اللي حصل مع تريلر مسلسل (أبواب الخوف)، بيحصل مع تريلر فيلم -أو مسلسل مش عارفين- (ألف ليلة وليلة).. أنا فاكر أيام ما صدر تريلر (أبواب الخوف)، وفاكر ردود أفعال الناس عليه.. لقيت ناس متحمسة جداً، بس كانت متحمسة وخلاص، ولقيت ناس شايفه ان الفشل هيواجه المسلسل لا محاله.. عن نفسي كنت شايف ان التجربة نفسها شيء ممتاز، شيء ممتاز انك تلاقي ناس عايزه تخرج من جو الأفلام والمسلسلات المعتاد، والأعمال النمطية الغبية الممله، اللي كل عمل منها واخد مـ اللي قبله.. وهكذا، لمّا كنت بدخل أي نقاش، كنت دائماً بردد: حتى لو كانت الكتابه مش حلوة، أو الخِدع مش قد كدة، مش هنظر للمسلسل على إنه فاشل، كفايه ان فيه ناس جازفت وخدت الخطوة الأولى، نحو حاجة جديدة الناس عندنا متعرفهاش، اللهم إلا الشباب المتابع للمسلسلات الأمريكية طبعاً. ونزل المسلسل، ونجح المسلسل، ونفس اللي حصل مع المسلسل، بيحصل مع فيلم (ألف ليلة وليلة).

فيلم ألف ليلة وليلة هو أول إنتاج مصري بخاصية الـ 3D (ثلاثي الأبعاد)، ومن المنتظر أن يُعرض في 2013، يتناول بعض الحكايات من كتاب (ألف ليلة وليلة) الشهير، ويضم العمل العديد من النجوم الذين برعوا في تقديم أعمال الحركة، منهم: عمرو واكد، غادة عادل، عمرو سعد، عزت أبو عوف، أحمد عز، سوسن بدر، غادة عبد الرازاق، أحمد بدير.. إخراج (تامر مرتضى)، وكتابة (محمد أمين راضي)، ويُعتبر هذا العمل هو الفيلم رقم 25 على مستوى العالم في استخدام الـ 3D، وبهذا أيضاً ستكون مصر هي الدولة رقم 4 في استخدام هذه الخاصية.

دة الموضوع.. طبعاً لو كنا قرأنا الخبر دة قبل صدور التريلر، كان زمنّا اتريقنا وضحكنا؛ لإننا للأسف آمنا ان آخرنا في الأفلام (شارع الهرم).. بس آهو، أخيراً حاجة محترمه وبتحترم فكر المشاهد، وبتحترم حاجته للتغيير.. أي حاجة تاني مش مهمه بقى، وعن نفسي مش هنظر لأي عيب من عيوب العمل؛ لإن التجربة لوحدها تستحق 10/10.

دة غير اننا أولى من الغرب بـ(ألف ليلة وليلة)، اللي اتعلم منها كتير، وعمل منها كتير، مسلسلات، وأفلام، وكومِكس.. كان ناقص يعملوا تيشرتات ألف ليلة وليلة.

من التعليقات اللي بعتبرها مجرد (فزلكة) ملهاش أي داعي:

• إن عزت أبو عوف شبه جاندالف!.. وأي ساحر على فكرة، هيبقى شبه جاندالف، لإن كل السحرة في القصص يتسمون بلحية طويله؛ لوزم الحِكمة؛ ولإن مكانش فيه مَكَن حلاقة زمان.

• إن عمرو واكد مش مالي العرش؛ ودة طبعاً يرجع لإن كل فكرتنا عن الملك؛ إنه تخين ومقضي يومه أمام صينية الرز والخروف الكامل، والفواكة.. دة واحد بيقتل كل يوم ست، وبيقضي أوقات الفراغ في الحروب.

• إن غادة عادل مش شبه (شهرزاد)؛ وكإن كل و احد فيهم شايل في محفظته صورة لـ(شهرزاد)، بيتفرج عليها كل يوم قبل ما ينام.

• وجود سوسن بدر، وغادة عبد الرازق في العمل.. فيه اللي شايفين انهم فلول، وفيه اللي شايفين، أنهم مينفعوش في التمثيل من أساسه.. بالنسبه لموضوع فلول؛ فأنا مبقتش اهتم بالقائمة السوداء أوي، ويمكن ساعدني على دة مقال (الفنان والجحش) للأستاذ أسامه غريب، بس دة ميمنعش اني بقيت بشمئز لمّا بشوف أي حد من فناني القائمة السوداء طبعاً. أما بالنسبة لكونهم مينفعوش للعمل، فأنا شايف ان (غادة عبد الرازق) أحسن من يؤدي دور الساحرة الشريرة، و(سوسن بدر) تنفع في ميدوسا جداً.

• إن (ألف ليلة وليلة) مفيهاش تنانين أصلاً، ولا ميدوسا حتى -ميدوسا أسطورة إغريقية والتنين صينية.. بس انا بقول: إن دي فانتازيا في النهاية، والكاتب مش ملزم يلتزم بكتالوج محدد للكتابة.. يعني انا طول عمري بحب أفلام مصاصي الدماء، لكن بقيت بضايق لمّا بشوف فيلم مش مغير في الأسطورة أو ضايف حاجة جديدة من عنده؛ لإنه بالشكل دة مش هيكون عمل حاجة جديدة -مننساش إن الغرب حرق (ألف ليلة وليلة).

على يوتيوب مهزلة طبعاً، فيه مصريين قاعدين يطلّعوا لسانهم للإخوة العرب؛ عشان قدرنا نعمل فيلم زي دة، وفيه عرب بيشتموهم، وفيه مصريين متفرغين للرد عليهم، وفيه مصريين عاقلين بيحاولوا يسكّتوا الطرفين، واحنا اخوات ومش عارف إيه... مهزلة حقيقية.

دة تريلر الفيلم

ودي أغنية (لمّا بدى يتثنى) الموجوده في التريلر، لـ(لينا شاماميان) الرائعة.. الغريب اني تعرفت عليها قبل التريلر بكام يوم

بالمناسبة: يُقال إن التريلر دة متسرب؛ وإن الشركة لم تعد تستخدمه.. أعتقد ان دة بيتضح في بعض مشاهد الجرافيك الغير مكتمله. بس، وفي النهاية أرسل تحياتي لكل الناس اللي ساهمت في العمل دة.. أنا بعتبر ان الفيلم دة، أخو (أبواب الخوف)؛ لإنهما العملين الوحيدين المختلفين عن أي شيء آخر رأيناه..

كل تمنياتي بالنجاح والتوفيق لهم.. ويارب نشوف من دة كتير بعد كدة.

8 ديسمبر، 2011