سلام عليكم..

بقالي ساعة أو أكثر، فاتح صفحة (رسالة جديدة)، ومش عارف اكتب حرف.. دي من اللحظات، اللي ببقى فيها عاوز اكتب، وحاسس اني لازم اكتب، ومع ذلك مش عارف اكتب إيه، مع إن فيه مشاعر كتير بتدور جوايا فعلاً.. عامةً الحزن يغلب دايماً..

دي (حالة) كتبتها عـ الفيس بوك من شوية، وحاسس اني لازم احتفظ بيها.. للأسف لم أنجح في تركيب آداة (التدوينات المصغرة)، وإلا كنت كتبت الحالة فيها وخلاص، بدل تدوينه كامله ليها بالشكل دة، مع إني نجحت في تركيبها في المدونة التانية (شبكة رعب)، وهي آداة مفيدة جداً، وبتنفع لو عايز تكتب (كلمتين في السريع)، زي تويتر كدة..

لغاية مااشوف لها حل، هضع الحاله هنا:

 

 

"لمّا بسمع إن فيه حد مات -أي حد- بتتغير نظرتي -لبعض الوقت- لأي حاجة بعملها، وأي حاجة بهتم بيها، وبيتحول كل شيء لـ(هبل)، ملوش أي لازمة ولاقيمة. قد إيه حاجات بسيطة أوي، وتكاد تكون تافهه، هي اللي بتخلينا نتمسك بالحياة، ونأمل في يوم جديد.. أكله سُخنة، فيلم حلو، كتاب جديد.. وفي الآخر بتموت.. بتموت قبل ما تحرر العالَم، أو تطلع الفضاء، أو تحصل على فتاة أحلامك.. بتموت قبل ما تشوف، أو تعمل (الشيء الكبير). كام واحد كان فاكر؛ ان نهايته هتكون سينمائيه، وإن آخر مشهد ليه في الحياة، يستحق الأوسكار؟.. ياترى النهاية هتكون بالتصوير البطيء، زي مابتخيل دايماً، ياترى هشوف النور، وهبص له وهضحك؟.. ياترى هتترمي في حضني وتاخد راسي على صدرها وتبكي؟.

كويس ان فيه أفلام، تخلينا نشوف اللي بنحلم انه يكون."

 

بس..

 

عايز اقول حاجة كمان:

أسلوبي الجديد في الكتابة داخل المدونة ملحوظ أكيد "الكتابة بالعاميه"، وتغير الطريقة القديمة اللي كانت بتبقى عامله زي مقدمي البرامج: أهلاً بكم أصدقائي زوار ومتابعي المدونة!... دة يرجع لإن نظرتي للمدونات اتغيرت، وأعتقد انها اتغيرت للأحسن، وبقيت بكتب (لنفسي وبس) بجد.. طبعاً بطير مـ الفرح، لمّا بلاقي حد عامل (لايك)، أو سايب لي تعليق، لكن مبقتش بهتم أوي زي زمان؛ لإني بقيت بكتب عشان اتخلص مـ اللي جوايا وخلاص.. زي ماتقولوا كدة: الروح والعقل بيتقيأوا هنا!.. تشبيه مقرف..

مدونتي دي شبهي أوي والله.. ملهاش هدف، زي حياتي كدة.

.

والسلام عليكم

» تابع القراءة

كلنا -أو أغلبنا- نعرف ماحدث للفيس بوك مساء أمس، من تعطيل لمدّة نصف ساعة كامله.. عن نفسي، مكنتش عارف اسجل دخول خالص، ولما دخلت، مبقتش عارف اعمل (Like)، وفي ناس تانيه، قالت؛ ان الـ (Wall) الخاص بالصفحات والبروفايلات، اتمسح لفترة مُعّينه.. وحاجات تانيه، معرفهاش..

الموضوع بدأ لمّا حركة (Anonymous) المشهورة، قالت في بيان تهديدي لها؛ انها  ستقوم بتدمير الفيس بوك يوم 5 نوفمبر القادم.. وبرروا دة؛ بإن الفيس بوك بينتهك خصوصية المستخدمين.. والحركة دي هي نفس الحركة؛ التي قامت باختراق موقع وزارة الدفاع السوري قبل 4 أيام تقريباً.. 

فيديو رسالة الحركة

ماقرأته وعرفته؛ أن هذه المجموعة مشهورة، وقوية للغاية.. 

واليوم قامت مجموعة تابعة لوزارة الدفاع السوريه، باختراق موقع هذه الحركة!.. يبدو أن الحرب الإلكترونيه قد بدأت..

السؤال؛ الذي نطرحه دوماً هو: ماذا سيحدث لو تم إغلاق الفيس بوك؟.. ستستمر الحياة بالتأكيد أعرف، ولكن.. هل ستصبح الحياة محتمله بدونه؟!.. خاصةً، أنه لم يعد مجرد آداة للهو، والتعارف.. الفيس بوك يساهم في إعادة تشكيل العالم الآن.. ترى، ماذا سيحدث؟..

***

أصحاب الفيس بوك نازلين التحرير، في مليونية؛ للتأكيد على ريادة الفيس بوك في المنطقة، والهتاف الرسمي:

• لا تويتر، ولا جوجل بلس، الفيس بوك هو وبس.

وأيضاً:

• لا تويتر، ولا بتنجان، الفيس بوك مليان مليان.

رافعين شعارات الفيس بوك المعروفة، من لايك، وشير، ونوتفيكشنز.. يقود المليونية، المناضل: مارك زوكربيرج، الذي تعهّد بتنظيف ميدان التحرير، من الإشعارات في نهاية اليوم.. وعلى صعيدٍ آخر، فقد أعلنت جماعة الهاكر التنظيمية، مسئوليتها عن الهجوم الذي تم شنّه على الفيس بوك بتاريخ 10 أغسطس، 2011، وقد ظهر قائد التنظيم، في فيديو تم بثه على المحطات الفضائيه، وهو يقول:

"لن ينعم الفيس بوك بالأمان؛ إلا إذا عاشه أهل جوجل بلس."

وبسؤال (جاك دورسي) -مؤسس تويتر- عن مشاركتهم في المليونيه القادمه؛ للتصدي لجماعة الهاكر، قال:

"كفاية مظاهرات، عاوزين نشتغل بقى.. عجلة الـ StatUs وقفت، حرام عليكم."

وفي تقرير، أعدّه مراسلنا، كانت هذه آراء الناس في الشارع:

• هو إيه الفيس بوك دة يا خويا؟!.

• يا أستاذ، لو الفيس بوك اتقفل، قول على الدنيا السلامة.

• يابني، أنا راجل عندي 65 سنه، ومبنامش قبل ما اكلم اصحابي على الفيس بوك، واتابع الـ Pages بتاعتي.. تقدر تقول لي: أنا هعيش ازاي، لو اتقفل الفيس بوك.

• الفيس بوك لو اتقفل، يبقى توقع (مبارك) يرجع الحكم في أي لحظة.

• يتقفل؟!.. دة تبقى القيامة قامت.

كان قد دشّن بعض النشطاء على الفيس بوك صفحة بعنوان (مش عارف اعمل لايك)؛ للتعبير عن غضبهم تجاه مايحدث، من تخريب للفيس بوك..

أما داخل مؤسسة الفيس بوك، فقد نظم العاملون لجان شعبية -بالسِنج والمقشات- للدفاع عن الصفحات، والجروبات، من أي هجومٍ آخر.

أما عن آراء الفنانين، فيمايحدث:

• عمرو مصطفى: الفيس بوك دي كلمة إسرائيليه، أنا عارفك يا عدوي.

• طلعت زكريا: الفيس بوك فيه دعارة، وطبل وزمر، وعلاقات جنسية كامله.

• عفاف شعيب: مش عارفين نعمل لايك، ولا كومّينت.

• مرتضي منصور: باسوورد (مارك زوكربيرج) عندي.

• توفيق عكاشة: لو قلت لي جروب الفيس بوك بيتعمل ازاي، ننتخبك رئيس جمهورية.

• السادات (الله يرحمه): وقد استطاعت قواتنا المسلحة، اختراق حائط الفيس بوك المنيع، في 6 ساعات.

وفق الله مصر وشعبها، والفيس بوك.

» تابع القراءة